Issu pianu pà a lingua corsa hè u sboccu di u votu unanimu di l'Assemblea di Corsica di u prima di Lugliu 2005, nant'à e pruposte d'urientazione di u Prisidenti di u Cunsigliu Esecutivu Anghjulu Santini.

Cù quidda deliberazioni a CTC avia accirtatu a so primura pà a quistioni di a lingua, chì par no' hè pulitica, ma spiccata da l'ideulugia.

Cunsacrava tandu l'impurtanza di a lingua corsa da fattori di cuesioni suciali, patrimoniu è risolsa pà u sviluppu di a Corsica.

U prughjettu pà a lingua hè glubali, è metta in cunsunenti dui prughjetti : un prughjettu educativu, cuncretizatu da u votu di u pianu di sviluppu di e furmazioni (PRDF, quaternu « Lingua è cultura corsa ») u 29 di ghjugnu 2006 è un prughjetttu « sucetali », vutatu à l'unanimità da l'Assemblea di Corsica u 26 di Lugliu 2007.

Riprisenta ‘ssu pianu una vulintà forti di a CTC è un prughjettu cullittivu pà a nostra isula.

Una riflessioni cullittiva cundutta da u Cunsigliu di a lingua è di a cultura corsa longu l'annata 2006

Dopu à u travagliu fundivu fattu in u quatru di u PRDF, a riflessioni nantu à u prughjettu « sucetali » hè stata cundutta da u « Cunsigliu di a lingua è di a Cultura corsa », direttu da un « cumitatu di rigiru », induva tutti i sensibilità di l'Assemblea sò riprisentati, è appughjatu nant'à un « cumitatu scintificu », prisidatu da Ghjacumu Thiers è chì u so rappurtore hè Pasquale Ottavi.

Un travagliu teoricu impurtantissimu hè statu fattu da u Cumitatu scintificu, chì hà resu u so raportu di ghjinnaghju scorsu « Lingua corsa : un fiatu novu ». Hà fattu u diagnosticu è datu ricumandazioni precisi d'urganizazioni par assicurà u sviluppu di a lingua attempu in l'usi tradiziunali è in l'usi novi di a sucità d'oghji ghjornu : Media, Cullittività, servizii publichi, impresi, educazioni di a ghjuventù è vita culturali. Ferma una Basa di rifarenzi pà l'azzioni è a riflessioni chì seguitarani, è u Cunsigliu Escutivu hà ritinutu assai pruposti di u Cumitatu scintificu.

I pruposti di u Cunsigliu Esecutivu di Corsica

A vulintà di u Cunsigliu Esecutivu hè stata di fà pruposti uparaziunali. Strada facindu, l'azzioni sarani valutati, stimati, è adatti cù u fini di sbuccà, d'avè risultati veri.

Hè un pianu strategicu, parchì si tratta d'una strategia cuerenti pà a lingua, chì voli ghjuvassi di tutti i strumenti d'azzioni di a CTC (Pulitichi d'educazioni, di furmazioni, pulitichi tarrituriali, culturali, vita di a cullittività, ecc…)

Dui acchisi di sviluppu sò pruposti :

-Rialzà u livellu di cumpitenzi è di pratichi individuali : sviluppu di u bislinguisimu in scola è fora di a scola (prima ziteddina è attività di piacè pà i ziteddi), infurmazioni è furmazioni di i genitori, dinamizazioni linguistica in a vita culturali.


-Dinamizà l'ambienti linguisticu : creà un strumentu tarrituriali pà a pulitica linguistica, stabbiliscia un Cartula di a lingua, fà una reta di « Casi di a lingua » in i tarritorii, allargà a piazza di u corsu in i media audiovisivi, dà una visibilità forti è durevuli di a lingua corsa à a CTC.

Simu cuscenti ch'eddu ùn hè 'ssu pianu cà u prima passu nant'à una strada longa pà sviluppà a piazza di a lingua corsa in a sucità, ma un passu impurtantissimu à u serviziu di a integrazioni, a cuesioni suciali è u campà appaciatu di a nostra sucità.

A lingua deve esse in core à u dibattitu annantu à i nostri valori.

U fattu di cunnosciala participeghja à u prughjettu di vita ch'è no vulemu pè a nostra isula.

Vutendu issu pianu à l'unanimità, l'Assemblea di Corsica hà mossu un attu impurtante pà l'avvena di a sucità corsa.

(source interview radio alta frequenza www.alta-frequenza.com)